Kaupapa: Technology

E rere ana ngā māharahara mō te mōrearea nui o te rapu hoa mā runga ipurangi

Wepiha Te Kanawa

E rere ana ngā māharahara mō te mōrearea nui o te rapu hoa mā runga ipurangi, i te whakamōhiotanga atu ki ngā pirihimana mō ngā wāhine e toru i pāwheratia whai muri i tā rātou haere ki te tūtaki i ētahi hoa i kitea mā runga i te pūmanawa tautono Tinder.

Ko tā te rōpū tauwhiro wahina o Tū Wahine, me kaha ake te aroturukihanga o ngā kiritaki.

E whakatewhatewha ana ngā pirihimana o Waitemata i ētahi whakapae pāwhera e rua i puta ake nā Tinder. Ināianei kei te wero atu tētahi kaitautoko wāhine Māori i ngā iwi me ngā hapū kia tautoko mai.

I puta tēnei take whai muri ake i te pāwheratanga o tētahi tūruhi nō Aotearoa e tētahi rōpū tāne i tūtakingia e ia mā Tinder.

Me te mea hoki e rua marama ki muri i hāmenetia tētahi tāne nō Queensland a Gable Tostee i runga i te whakapae nāna a Warriena Wright nō Aotearoa i kōhuru. I tūtaki hoki rāua mā runga i a Tinder.

Kua toru tau te Pūmanawa Tautono o Tinder e haere ana, ka hono atu te hunga rapu ki a Puka Mata kia kite ai i ngā whakaahua, me te pakeke o te mea kite, ā, mā te hangarau GPS ka taea e rātou te kite kei hea koe.

He tekau miriona ōna kaiwhakamahi puta noa i te ao. E ai ki a Lee Chisholm nō NetSafe he ūmanga e ū ana ki te ako i ngā tāngata me pea hea te noho haumaru ki runga i te ao pāhekoheko ipurangi, e āwangawanga ana ia ki te ngāwari o te whakamahi.

E ai ki a NetSafe kāore e kore ka piki haere te tokomaha o te hunga ka whakamahi i ngā Pūmanawa Tautoko pēnei i a Tinder i ngā rā kei te heke mai, heoi e whakatenatena ana rātou i te iwi kia āta whakaaro.