Kaupapa: Australia

E rapu tonu a te Ture o Poipiripi i ngā tuahine tokowhā e ngaro ana

E rima wiki te roa o ētahi tuahine tokowhā e ngaro ana i Ahitereiria, he mea kahaki e tō rātou pāpā.  He uri nō Rongowhakaata me Te Aitanga a Māhaki, he mokopuna ngā kōtiro rā nā te kaipāpāho Māori ō-mua, nā Maihi Nikora.

Ko tōna tikanga, he mea tohatoha te mana tiaki i ngā tamariki i waenga i te tamāhine o Nikora, arā te whaea o ngā tamariki, me tō rātou pāpā.

He mea tango mai ngā kōtiro i te kura me te puna kōhungahunga e tō rātou pāpā, e Joseph Smith, i te rua tekau mā whitu o te marama o Oketopa.  Ahakoa ētahi īmera, kua kore e kitea noa mai anō i taua wā.

Kua iri ake he whārangi pukamata i te whānau, engari, hei tā rātou kua takaroa te taha ki ngā pirihimana nā te mea karekau tētahi matua kotahi i whakamanatia hei kaitiaki motuhake.

I kōrero a Te Kāea ki te tari pirihimana o Werribee, pā tata atu ki Poipiripi, me ta rātou whakamana i te kōrero kua kake ake te take nei hei kēhi ngaronga tangata.

E ai ki a Maihi Nikora e māharahara ana ia mō te hauora o āna mokopuna, mātua rā te mātaamua a Charity-Beth me tana māuiui pūkahukahu.

Kāti hei tēnei marama tonu rangona ai ngā tono e rua a Stacey Smith ki te kōti, he tono haumaru, he tono whakahoki anō rā.

Heoi, ināianei e rapua ana a Joseph Smith e ngā pirihimana o Poipiripi.