Ngā kaupapa: Kapa Haka, Te Haumi - Day 2, Te Matatini

E puta tonu ana te ihi, te wehi me te wana ki te rā tuarua o Te Matatini

Heeni Brown

I te rangi tuarua o Te Matatini, ko ngā kapa tekau mā rima o te puna o Te Haumi kei te takahi i te papa tauwhainga, ā, ko ngā toa o mua, ko Te Mātārae i Ōrehu, ko Whangara, ko Te Rōpū Manutaki anō ētahi o rātou.

Whatitiri ki te rangi, ko Te Mātārae I Ōrehu, te toutou i te ahi o Te Matatini.

Ta Wetini Mītai-Ngātai, ko te kawe i te ihiihi o ōna mātua.

Ko te iho nui a Donna Grant te whakatau ki te motu, engari nā tana rōpu te kupu whakamutunga.

Ko tā Pakake Winiata, “"Tō mātou whāea a Aunty Donna kua utaina ētahi kōrero, ētahi whakapae ki runga i a ia, ko tā mātou he kī atu rā ki te hunga kakama kaha nei ki te mahi tērā mahi, kia maumahara ki ngā kōrero e mea nei waiho mā te tangata kāre anō kia hara, e whiu te kōwhatu tuatahi."

A, ahakoa he tauhōu ki Te Matatini, ehara i te mea he ihu hupe a Tutara Kauika ki te Haka. A, tēnei te kawe mai i nga mamae o te rautau.

Ko tā Awanuiarangi Black, “"Ahakoa rereke pea te tau, kāre rawa e tino rereke rawa atu ngā mahi, ne a te hunga kei a ratou te mana whakahaere o te motu.Kei konei tonu te hunga pēnei i a Iharaira nei na, ngā tamariki o tērā wā kei roto tonu te kaupapa, a, ko ratou kei te whakahāere, ko matou kua ahua koroua nei kei muri e whaiwhai atu ana.”

I raro i ngā hīhi o te rā, ko te tumu o Ngā Purapura o Te Tai Hauāuru e patu mahara ana ki ngā korero a ō rātou mātua tupuna, tohu hoki mō te rangimarie.