E pōraru tonu ana ngā whakaaro ki ngā mema o Te Pātaka Ohanga

Kei te pupū tonu te rangirua mō te kamupene tūmataiti, mō Te Pātaka Ohanga, ināianei nā ngā pōhēhētanga mō ngā mema o tana poari.

I te timatanga o tēnei wiki whakapuakitia e te Poari Matua o Te Kohanga Reo ko Tukoroirangi Morgan tētahi o ngā mema tokorima o te poari a Te Pātaka Ohanga, hēoi, e ai ki a Morgan, karekau noa.

Apiti atu, e rere ana te pātai pēnā e tika ana kia riro mā Tukoroirangi Morgan te whakahaere o te hui nui mō te kohanga reo ki Tūrangawaewae a ngā wiki tata nei, i runga i te mōhio ko ia tētahi mema o Te Poari Matua o Te Kohanga Reo me Te Pātaka Ohanga.

I Te Pātaka Ohanga e tiro hōmiromirotia ana, te āhua nei karekau te ringa māui i te mōhio e aha ana te ringa matau.

I te timatanga o tēnei wiki i puta i Te Poari matua ngā ingoa o ngā mema o Te Pātaka Ohanga, ā, ko Tukoroirangi Morgan tētahi – hēoi, te āhua nei he rongo hōu ki a ia. 

I te timatanga o ngā raru mō Te Pātaka Ohanga, tokotoru ngā mema o tana poari. No tenei wiki ka whakahuatia tokorima kē ināianei, ko Tukoroirangi Morgan rāua ko Tata Parata ngā mema hōu.

Hēoi, karekau i te mohio nonahea rāua tohua ai, engari e ai ki te māngai mō te Poari Matua, ae mārika he mema a Tukoroirangi Morgan ki Te Pātaka Ohanga.

Kaati, i ara ake tēnei rangirua nā te pātai pēnā e tika ana kia riro mā Tukoroirangi Morgan e whakahaere i te hui mō ngā kohanga reo ki Tūrangawaewae.

E mōhiotia ana kei te taupatu ētahi kohanga ki te poari matua, waihoki te pataka ohanga, ā, kua whai tūranga a Tukoroirangi Morgan ki te noho ki ngā poari e rua.

E tika ana he pūkenga ō Tukoroirangi Morgan ki tēnā tū mahi, i kitea i tana ārahi i te hui mō te mana ki te wai. Hēoi, ko te wawata a Arapeti Ruri mā, ka tūwhera te papa ki ngā whakaaro ō te katoa.

Kāti, hei te wiki tuarua tera marama tū ai te hui.