Kaupapa: Kōhanga Reo

E kore te kirimana matua i waenga i te Kōhanga me Te Manatu Mātauranga e whakahoungia

E kore te kirimana matua i waenganui i te poari matua o Te Kōhanga me Te Manatū Mātauranga e whakahoungia, koia tērā mō te pūtea whakahaere i te poari.

Koia te whakatau, e ai ki tētahi reta i tukuna ki Te Poari e ngā Minita Take Mātauranga, e Hekia Parata rāua ko Tākuta Pita Sharples. He kōrero tēnei i kapohia ake e tā mātou karere take tōrangapū, e Maiki Sherman. Tūturu, kua whakatakotohia te manuka ki Te Poari Matua kia whakatikaina tōna whare, kia hāngai ki ngā hiahia a ngā whānau o ngā kōhanga o te motu.

E ai ki Te Kōhanga Reo o Te Teko kua roa ngā nawe a Mataatua/Tauranga Moana e karohia ana e te Poari Matua, engari na te reta a ngā minita kua taka te toki.

Hei te toru tekau o Pipiri mutu ai te kirimana a te Manatu Matauranga me te Poari Matua, ā, e ai ki te Manatu e kore e whakahoungia.

He kirimana rua ira rima miriona ia tau mo ngā mahi whakahaere a te Poari. E ai ki te Manatu, na te ngoikore o te Poari ki te tautoko i ngā kōhanga reo te take.

E ai ki a Lorraine Hail o Te Kōhanga reo o Te Teko, “e kore e taea e rātou te karo inaianei kua puta te tohu inā me āta arotake rātou ēnei ahuatanga.”

Mo te taha ki ngā nawe o te wā e tika ana ka whai kaha ēra i te reta, otira i te ara hou e whiwhi kirimana hou ai te poari.

Ko ngā akiaki a ngā Minita he whakakore i ta te mema noho ki te poari ā mate noa. Kia tohua ngā mema poari ma tetahi punaha pōti, e whai waahi atu ai ngā whanau kōhanga. Ka mutu, me whakahou te poari i tana mana, otira te whirinaki a ngā kōhanga ki a ia.

E whakaae ana a Lorraine ki aua whakatau, “me whai reo ngā whānau ahakoa ko wai o ngā rohe ka tohungia hei māngai mo te rohe ki runga ake ki te poari ma te aha tēna engari māna tonu e kawe i ngā korero a te rohe ki mua i te aroaro o te poari.”

Ko tētahi atu akiaki e mea ana kua hē ngā ra o Te Pātaka Ōhanga a me āta tirotiro ano āna mahi mo ngā kōhanga e te poari matua. Mo te taha ki te kokoraho Tiriti o Waitangi, e ai ki te reta ka koke whakamua kia tau rāno tēnei take. Apiti atu ko te wawata kia whai tūru pea te karauna ki te poari matua o te kōhanga reo, he kitenga i te pūrongo kokoraho a Tā Michael Cullen.   

Hei tērā wiki tu ai te hui nui a Kingi Tuheitia mo ngā kōhanga reo ki Turangawaewae, me te wawata ka matapakitia ngā āwangawanga nei. Heoi, koinei te paeroa e whakarārangi ana i ngā whakahaere i te hui, ā, kāre i te marama kitea ki hea wherawheratia ai ngā take i pupū ake ai tenei raruraru.

E ai ki a Lorraine, “Kua kitea e au ētahi wānanga engari kare ano kia kitea au te wā ka tāea e mātou te whakatakoto whakaaro mo ngā raru nei, e āta ware au ki tena.”

Kaati mo te taha ki te pūtea a ngā kōhanga reo o te motu, e ai ki ngā Minita karekau tēra e raru noa, otira ka rere tonu.

Ahakoa na ngā pakeke o Te Kōhanga Reo o Te Teko, otira o te kāhui o Mataatua/Tauranga Moana, ngā nawe i whakapuaki tuatahi ake, karekau rawa ngā mokopuna mo te rongo i taua taumaha, otira, e haere tonu ana te kaupapa.

Kāti, e ai ki te reta, hei te toru tekau o tēnei marama hiahiatia ai e ngā Minita he whakahoki i Te Poari Matua. I tuku tono uiui a Te Kaea ki te poari i te rangi nei engari auare ake.