E kore a Ngāti Paoa e wero ā-ture i te Karauna

Wepiha Te Kanawa

E kore a Ngāti Paoa e wero ā-ture i te Karauna mō te mana hoko tuatahi i ētahi whenua o Tāmaki, ahakoa tā Ngāti Whātua rāua Waikato-Tainui whakatau inanahi, koia tonu tā rātou mahi.

Hei tā Hauāuru Rawiri, kai-whiriwhiri o Ngāti Paoa, ko te whakatau i tā rātou kerēme te whainga matua ki a rātou.

E kōkiri ana a Ngāti Whātua rāua ko Waikato-Tainui i a rātou take ki te kōti, engari tē whai a Ngāti Paoa.

E ai ki a Hauāuru Rawiri, “Kei tēna iwi, kei tēna hapū o rātou ake mana motuhake, ko wai mā mātou te whakahē?”

Kei te tārewa tonu te whakataunga kerēme i waenga i a Ngāti Paoa me te Karauna.

Ki tā Rawiri, “E toru ngā iwi kua puta te ihu, kua kuhuna atu ki te kēti, nā reira tekau e whiriwhiri tonu ana, e kōrero tonu ana me te karauna ki o tātou kereme.”

Hei tā Hauāuru ehara i te mea kei te taiwhanga kōti te rongoā, engari kei te tēpu whakawhitiwhiti kōrero kē.

Hei tā Rawiri, “Ko tā mātou me kōrero i te tuatahi me whai hua, me whai huarahi. Mai i tēnā katahi anō tātou ka whaiwhai haere he ara kia tutuki i ēnei tūahua.”

E ai ki a Hauāuru kei a Ngāti Paoa ngā rauemi ki te whakapiki i te nui o ngā whare ki Tāmaki.

E ai ki a Rawiri, “I roto i ngā niu pepa, i roto i te pouaka whakaata he tino raru me te korekore o ngā whare o roto o Tāmaki, nā reira ka pehea mātou o Ngāti Paoa te mahi ngātahi me te kāwana.”

E manako ana a Ngāti Paoa kia waitohu rātou i tā rātou whakataunga kereme a te marama o Hereturikōkā, heoi ināiānei ko te karo i ngā kōti te mahi.