E karanga ana te Kāhui Rangatira ā-Iwi kia haumi pūtea te kāwanatanga ki ngā whenua Māori

updated
Iwi leaders - Photo / file

E karanga ana te Kāhui Rangatira ā-Iwi kia haumi pūtea te kāwanatanga ki ngā whenua Māori e noho ngoikore ana i tēnei wā.

Tūturu he nui te hua e takoto mai ana i roto i ngā whenua rā, ko te mate kē, me whai rauemi hei hauhake i ēna hua.

I Aotearoa nei he kotahi ira rima miriona heketea te rahi o te whenua Māori, e toru rau mano heketea e whai hua ana, ā, he kotahi ira rua miriona e noho ngoikore ana.

Ko te tono a Te Kāhui Rangatira ā-Iwi ki ngā minita - whakatōngia he kākano pūtea.

Ko te toru piriona tāra e whaia ana e mātou, kei te hāngai pū mātou ki te rīpoata i puta mai i te tari ahu whenua me te kī he toru piriona tāra kia whanaketia ngā whenua nei.

Tūturu e taupatupatu ana ngā whakaaro a ngā taha e rua mō te taha ki te pūtea.

Heoi, ki tā te rīpoata a te Manatū Ahu Matua i tērā tau mā te haumi i te toru piriona tāra ki aua whenua, ka puta he hua waru piriona te nui, waihoki, ngā tūranga mahi tata ki te whā mano.

Ko te hiahia a Te Kāhui Rangatira ā-Iwi he kotahi piriona tāra i te kāwanatanga kia kōkiritia ai ngā mahi whakawhanake.

E ai ki a Willie Te Aho he uaua mā ngā kaipupuri whenua Māori te whiwhi pūtea taurewa i ngā pēke - ko te āki ki te kāwanatanga, whakatikahia.

Kāti, e ai ki te Minita Whakawhanake Māori ki a Te Ururoa Flavell mā ngā whakarerekētanga ki te Ture Whenua Māori e whakamāmātia ai tēnā taumaha.

Kua karangahia e Te Kāhui Rangatira ā-Iwi tētahi hui ki ngā minita, ā, mā te wā noa ka kite pēnā he hua ka tipu mai i tēnā kākano.