E kaha whakahē ana ētahi i te ture a tētahi Cotton On e whakakore ana i ngā wā whakatā a a rātou kaimahi

updated Te Kāea

Kua puta te tono a ngā rangatira o kamupene kākahu rongonui a Cotton On kia kaua ōnā kaimahi tekau mā rima ki tētahi wāhi mahi ōnā i Tāmaki ki te Tonga, e whai wā whakatā, kai rānei. E ai ki a First Union, ko rātou tonu i te wā nei e whiriwhiri kōrero ana mō ngā kaimahi, engari kei te whai hua kē a Cotton On i tētahi ture-kino.

Ko te tono-whakaae tēnei ki waenga i a First Union me Cotton On.  Kua tata ki te tekau marama e whiriwhiri ana i ngā kōrero o roto.

Te āhua nei, ka haere tonu ngā whiriwhiri kōrero na runga i tā First Union whakatau ka kore rawa e whakaae ki te tono a Cotton On.

I whakapā atu mātou o Te Kāea ki te tari matua mō Cotton On i Ahitereiria.  He aha hoki tā rātou, kia mukua i ngā wā whakatā ki ōnā kaimahi.

Engari kahore anō kia whakahoki kōrero tūturu mai.  Heoi tā Cotton On, ki tōnā pukamata FB, kahore anō kia whakarerekē ngā tikanga mahi, mā ōnā kaimahi ki ōnā toa-hokohoko.

Engari, e haere tonu ana ngā whakawhitiwhiti kōrero me First Union.

Ā, ahakoa he tono whakaae, tekau mā rima kaimahi noa iho kei te kōrerotia.  Koira ngā whakaaro a ētahi ki te take.

I tērā tau i mukua te mana ki ngā wā whakatā e te kāwana mā roto mai i te ture amenemana take mahi.

Ā, koira tā First Union kia āmenehia anō te ture.

Hei tā Kelvin Davis, "Ko tēnei kamupene te tuatahi engari mōhio ana tātou mātakitaki ana ngā kamupene atu ki tēnei kēhi mehemea ka whakakorengia ngā wā kai mō ēnei kaimahi, ka pēnei tonu ētahi kamupene."

Ki tā Te Ururoa Flavell, "Tērā pea taihoa ake nei kia tirohia ka ahu pēhea tēnei take."