Kaupapa: Entertainment

E hokona hētia ana te kiriata Mt Zion

E ai ki ngā korero kua tau mai kia Te Kāea, tokorua ngā tāne e hoko ana i te kiriata nei ki ētahi rohe o Tamaki Makaurau.

I te tupono tūtaki raua ki ētahi tangata e hikoi ana me te pātai, mena rānei kei te hiahia rātou ki te hoko kape. I korero tētahi o aua tāne ki tā mātau tangata ko Mt Zion te kiriata nui rawa i tenei wā ki Aotearoa.

I roto raua i tētahi waka Honda, kua haumaruhia nga matapihi, i te mau tētahi o aua tangata i tētahi poraka NRL kahurangi, he hingareti NBA  waiporoporo me te kowhare e mau ana te tuarua.


I whāki atu a Te Kāea enei mohiotanga ki nga kaihanga o te kiriata nei kia Te Arepa Kahi rāua ko Quinton Hita i te rā nei me tā rātou kaha ohorere ki te rongo i aua maramatanga. Ko tā raua he tino pouri kē taua ahuatanga mo rātou ngā kaihangta me te katoa o te hunga i whakapou kaha ki te whakatinana i taua kiriata ra.


Kua tukuna atu ngā maramatanga mō te tokorua nei kia raua me ngā pirihimana. 


I te tau rua mano tekau i hokona hētia te kiriata o Bpy i Waihau Bay, te wāhi tonu i hopungia ai ngā pikitia o te kiriata. A, hei tā Taika Waititi, te kaihāutu o te kiriata, i pouri rawa ia i te whakāro i whānakohia tana kiriata me te hoko hē atu mō te moni te take.


Kua whakātuhia ai te kiriata nei a Mt Zion ki te hunga papāho i Tamaki Makaurau, ko te kī a ētahi mena i hopukina hētia te kiriata i taua wā he tere rawa te huringa haere kia hoko atu. I tenei wā kei te kōrerotahi ngā kaihanga o te kiriata mē ngā pirihimana ki te rapu hāere i te hunga nanakia e hoko atu ana i kiriata nei.


Ki te mauheretia tētahi mo aua mahi, ko te whiu mo ēnei mahi whānako ko te rima tau i rō whare herehere, he tekau mano tāra rānei mo ia kōpae ka hokona atu.