Kaupapa: Entertainment

E heke ana te Kaiwhakahaere Matua o te Tari Kawe Pūrongo o Whakaata Māori

I te wiki nei i puta i a Whakaata Māori te whakatau mō te hekenga iho o Te Anga Nathan hei Kaiwhakahaere Matua o te Tari Kawe Pūrongo me te whakatūhanga o Julian Wilcox ki taua tūranga.

Nō Te Aupouri, Tainui me Ngāti Porou a Nathan, mai anō i te orokohanga mai o Whakaata Māori e iwa tau ki muri nei a ia e mahi ana ki te pou whakaata. 

E wehe ana ia ki te whai i ētahi ara kē atu. Ka hūnuku atu a Wilcox o Ngāpuhi, Tūwharetoa me Te Arawa i tāna tūnga kaikawe i te hōtaka o Native Affairs ki te tumu whakahaere i te tari kawe pūrongo.

Hei te Rāmere mana ai tēnei panonitanga, hei reira mihia ai a Julian i tētahi whakatau ōkawa. Ka noho mai a Te Anga tae noa ki te weherua o te tau, hei kaiwhakahaere kaupapa motuhake mā Whakaata Māori.