Kaupapa: Te Reo Māori

E āwangwanga ana ētahi ki te poto o te wā kua whakaritea hei āta wānanga i te rautaki reo Māori

E whitu ngā hui ka tū i ngā wiki e rua nei, hei matapaki i te rautaki reo Māori hōu a te Minita Take Māori. Ā, ko te whakapae a ētahi, he whiu te otinga ki te kōkiri i tēnei whāinga a Tākuta Pita Sharples. Ko te tuatahi o ngā hui whakawhitiwhiti kōrero i tü ki Porirua i te rā nei. I reira tā mātou karere a Ripeka Timutimu.

Hei tāna,” ko te korero kei ngā ngutu, kua poto rawa te wā mai i te whakapaahotanga o ēnei hui i tēra wiki, ki tenei wā, a kaore ano ētahi e marama ana ki ngā nekenekehanga. Engari he wairua pai i waenga i te hui tuatahi, a ko te anga whakamua o te reo Māori te kaupapa matua.”

He kupu nui hei whakarongotanga mā nuipuku horapa i te motu. Kia kakama te haere ki te whakaputa whakaaro mo te oranga o te reo kamehameha.

E ai ki a Maraea Hunia o Ngāti Awa,  “i puta ngā kōrero i tēra Mane heoi, whitu ra noaiho i a tatou ki te huihui ki te pānui i ngā pukapuka ara te rautaki reo hōu.”

Ko tētahi whāinga nui o te rautaki reo Māori hōu, kia whakatū tetahi rūnanga ā iwi hei mana whakahaere i Te Taura Whiri i te Reo Māori me Te Māngai Pāho hoki.

Ko tā te Minita i ngā Take Māori ko Pita Sharples, “kei te tautoko te kaupapa nui kei roto i tenei rautaki kia whakahokia te mana ki te Iwi ki ngā hāpū nō rātou te reo." 

Engari ko te raru kē, he rerekē ngā whakaaro o ia tangata, he mahi nui ki mua i te aroaro ki te whakaputa i tētahi rautaki hōu kia noho tau ai i waenga i te katoa.

Ko tā Maraea Hunia ano he poto rawa te wā he nui hoki ngā tāngata kei waho rā kāre i te mōhio he hui kei te hāere mo tēnei take whakhirahira.

Hei apopo tu ai te hui tuarua ki Rotorua, a hei te mutunga o te wiki e tu mai nei ka tu te hui whakamutunga.