E akiaki ana i te Māori ki te whai i te mātauranga pūtaiao

He momo akoranga pūtaiao e mimiti ana te puna Māori, he uaua tonu te kitea o te kanohi Māori. Heoi kei te taikaha te tari Rangahau Ahumāra Kai, ki te whakapiki i ngā kaute me te āwhina i ngā tauira Māori kia uru mai ki tēnei mahi.

E ai ki tētahi tauira, a Hanareia Ehau-Taumaunu, “Tōku tūranga i konei he tauira, i roto i te Rangahau Ahumāra Kai, tēnei wāhi ngā momo mahi o te putaiao i roto i ngā tipu me ngā rākau. Ko tāku mahi ki te taha o te kiwifruit, te kiwikiwi, e titiro ana ki ngā whanaungatanga i roto i tēnei wāhi me ngā kaitipu i ngā kiwikiwi Māori.”

Hei tā te kaipūtaiao matua, a Richard Newcomb, “Ko tā mātou hiahia kia rahi ake ngā Māori ki roto i ēnei mahi, ā mā ngāi Māori anō e rangahau ngā hua Māori, hei painga anō mō te taha ohaoha Māori.”

Kua tata ea te toru tau e ako ana a Hanareia i ēnei mahi, me te aha, ehara i te mea nō naianei tonu i uru mai te hiahia ki roto i a ia ki te whai i tēnei momo mahi. He maha anō hoki ngā kaitautoko kei konei i te tari Rangahau Ahumāra Kai hei awhi i ngā tauira Māori.

Ki tā Ehau-Taumaunu, “He rawe te pūtaiao ki au, kei te ako i ngā mea hōu i ngā wā katoa, ka titiro ki ngā mea tino itiiti rawa, ki ngā rākau nunui. He maha ngā momo wāhi ka taea te rangahau, ā, mai te wharekura kua tino hiahia au ki ngā mahi pūtaiao.”

E ai ki tētahi kaiāwhina, a Jenny Green, “Ehara kei te raumati anake ngā tautoko, heoi ka āwhina ahau i a rātou i ngā wā katoa, ahakoa he aha te hiahia.”

Otirā, kei ngā taumata noa atu ngā hua ka puta mō ngā tauira pūtaiao Māori hei te otinga, ko wai ka mōhio e hia nei ngā kuaha ka huaki mai mō rātou.