E āki ana ngā kaunihera kia whiwhi raihana te hunga hoko hāngī

Taroi Black

E āki ana ngā kaunihera kia whiwhi raihana te hunga hoko hāngī i raro i ngā ture kai me te whakahaumaru.

Engari kei runga ipurangi e tautohetia ana tēnei take nui nātemea e mau tonu ana ētahi ki ā rātou ake whakaaro ina he kai tuku iho tēnei.

Ka rerekē ngā tikanga tunu kai i roto i tētahi ture hou ka whakarewaina hei tērā tau mō ngā momo tikanga, hoko me te tunu kai.

E ai ki a Naomi Herewini, “Kare au i te tino rata ki tā rātou e hiahia nei nā te mea ka whakakorea te whakamahi me te whakahaere i tēnei tikanga. Kei tērā hapori kei tērā hapori ōna ake whakahaere.”

Kua pupū ake hoki te tohe a ētahi mō ngā hāngi ka hokona mā runga pukamata mō te kore mau raihana kai.

Hei tā Naomi Herewini, “Ki te taka mai tētahi rautaki ki runga i tētahi āhuatanga, ae akena pea ka raru.”

Heoi anō e mahi tahi ana te kaunihera o Tāmaki Makaurau me ngā marae maha, me ētahi atu kaihoko kai ki te whakaako i ā rātou ki ngā whakahaeretanga tika, i a rātou e whakawhiwhi ana ki te raihana. 

Ā, kei te pērā anō ngā ture hoko kai, me whiwhi he raihana ahi.

Ki tā Piki Thomas nō NZ Fire Service, “Mō te hunga e tunu hangi ana he orite ngā tikanga ki tēnā, ki tēnā o ngā takiwā o te motu nei. Ko te mahi nui kia pātai atu ki to kaunihera a rohe mehemea e whakaaetia ana te ahi o te hāngī ki tō takiwā.”

I tēnei wā kei te kimi ngā kaunihera i te hunga hoko kai mā runga ipurangi hoki, ehara i te hunga mahi moni mō te wā kotahi noa.