Kaupapa: Entertainment

Atamira Dance Company the first to represent NZ at prestigious Beijing Dance Festival

Wikitōria Day

Nō nā tata nei rere atu ai te kamupene kanikani o Atamira ki Kōrea, ki te kawe i tā rātau whakaaturanga e kīa nei ko Moko, ki tētahi o ngā taiopenga kanikani taioreore i te ao.

I kōrero mai tētahi o ngā kaihautū ki a Te Kāea, i mua i tā rātau rerenga atu ki tāwāhi.

He whakairo i ngā kōrero Māori, mā roto mai i te mahi auaha.

E manahau ana a Atamira, inā ko rātau te kamupene kanikani tuatahi nō Aotearoa kia kōwhirihia mō te Hui Kanikani o Beijing.

Hei tā Moss Patterson, “Ko te Hui Kanikani o Beijing te tatau ki te ao kanikani moroki, huri i a Ahia, nō reira, he tīmatanga pai tēnei mō mātau.”

He mana nui tō te hui, ā, he tohu tēnei o ngā taumata angitū kua ekea e Atamira.

Ki tā Patterson, “Ko te angitu te tino tūmanako. Engari, e kore mātou e haere whakatoatoa, nō reira he whakaheke werawera te mahi kia rangatira ai te pakanga mō te iwi, te take.”

Tua atu i te ngahau, he hono ano i te taura here tangata ki waenga i te iwi Māori me Haina te whai.

E ai ki a Patterson, “He nui ngā rangahau mātauranga tikanga tāngata e paihere ana i ō mātou hītoria, i Aotearoa atu ki Te Moana-nui-a-Kiwa, whakawhiti atu ki te pokapū o Āhia, nō reira he huarahi tēnei ki ērā taumata kōrero.”

A te wiki nei rongo tuatahi ai te kāhui i te hāwenewene o ngā mahi auaha i te atamira ā ao.