Kaupapa: Waka Ama

Ahakoa te kaha o ngā kapa waka ama o Aotearoa ki te whai i te whiringa toa kaore rawa i tutuki

Rahia Timutimu

Ko ngā pākeke tāne o Aotearoa tētahi o ngā kapa tuatahi, i whai wāhi atu ki te tiki mai i ngā mētara kōura tuatahi o Aotearoa ki ngā whakataetae o te ao nei.

I te iti o te wā ki te mahi tahi, i whakawhirinaki ai ēnei kaihoe ki ā rātou ake whakangungu takitahi e whakawhiti tuatahi ai rātou i te rārangi whakamutunga.

Mai anō i te ara tuaono o ngā whiringa toa mō te hunga pākeke o ngā waka hourua, kāore kē he painga i a Tahiti, nā whai anō i kore ai a Aotearoa e whakawhiwhia ki tētahi mētara i te taenga tuawhātanga mai.

Whāia ka tae ki te whiringa toa o te wāhanga ika-a-Whiro mā ngā wāhine o ngā hoenga waka hourua, hāunga te whiringa whāiti koinei te tuatahi o ngā wā kua hoe tahi ēnei wāhine, ka mutu nō rātou te wā tere tuarua o tēnei tauwhāinga.

Hei tā tētahi kaihoe, a Mereana Hodges, “Ko tā mātau ko te upoko pakaru mō tā mātau whenua, mō ngā whānau hoki kei te kāinga. He rima hēkona tere ake a Tahiti ia mātau, nā reira ko te whakapoto taua wā te whai. Heoi he uaua nā runga i te mohio he rā roa mō mātau, ki roto i ngā whiringa whāiti, whiringa toa hoki.”

Nō rātou i te ara tuarima, ko Tahiti ō rātou tino hoariri, te kapa i tae papatū atu me te wā hohoro rawa i ngā whiringa whāiti.

E ai ki a Mereana Hodges, “He kapa toa tā mātau, kua hanumi ētahi o ngā kaihoe takitahi toa o te motu me tētahi kapa toa nō Turangawaewae.”

Wairuatoa he 11 kaihoe noa iho i tae atu ki te rēhi i tōna tikanga me 12 kē, koinei rātou i hāmenetia ai, te take tonu rā ka hoki mētara kore ai rātou ki te kāinga mō te wāhanga ika-a-Whiro wāhine e hoe waka hourua nei, ahakoa i reira te āheinga e toa pea ai rātou.

Tae rawa ki te rēhi whakamutunga o te rā, i warea katoa ngā whakaaro ki te kapa ika-a-Whiro tāne nā rā i a rātou te āheinga whakamutunga e whakawhiwhia ai a Aotearoa ki te mētara kōura, mai anō i te ara tuarima kotahi tonu te rautaki i a rātou.

E ai ki a Turi Hodges, “He mea hanumi tēnei kapa ki ngā kaihoe, puta noa i te motu, ka mutu i noho tautauāmoa rātou ki a rātou.”

Hoki atu, hoki atu, ko Tahiti te iwi kaitangata katoa o ngā whakataetae nei, i mahue ko Aotearoa me Pārihi ki ā rātou maramara mō te tūranga tuatoru.