TV show sub navigation

Ngā Tohu Reo Māori 2017

I te pō o Ngā Tohu Reo Māori 2017 a te Taura Whiri i te Reo Māori, e rua ngā tohu i whakawhiwhia ki te hōtaka Pāia, nā Māui Television Productions i hanga.

Ko Waioira rāua ko Rereahu ngā pūkōrero rangatahi e whakahaere ana i tēnei hīkoi tātāwhāinga o ngā mahi mātātoa, e toro ana ki ngā wāhi pārekareka tino rongonui o Aotearoa, pērā ki te Papatākaro Tūrapa i Rotorua.

I tutuki pai i a rāua te tūpou 47 mita i runga o te Taupō Bungy, te eke motupaika whā wīra ka tirotiro haere ki ngā wāhi ātaahua o Ngongotaha me Rereahu, me te ara Eke Kōneke i Skyline Rotorua.

He tino whānui te whakamahi a te hōtaka i te reo Māori. Ka hangaia he kupu hou mēnā kāre he kupu Māori mō tērā kupu, otirā kei roto i ngā mahi he whai wāhitanga ki te whakamahi i te reo o te rangatahi mō ngā mahinga me ngā kare-ā-roto rerekē.