Peter-Lucas Jones

Ngāti Kahu, Te Rārawa, Ngāi Takoto and Te Aupōuri (I tohua e Te Pūtahi Paoho)

Kaiwhakahaere Umanga

I tohua a Peter-Lucas Jones ki te Poari o Whakaata Māori i te 23 o Hakihea 2016. Ko ia te Kaiwhakahaere Matua o Te Hiku Media, te reo irirangi ā iwi me te pokapū pāpāho a ngā iwi e rima o te Tai Tokerau; Ngāti Kahu, Te Rārawa, Ngāi Takoto, Ngāti Kurī me Te Aupōuri. I pakeke mai a Peter-Lucas i roto i ēnei hapori kōrero Māori, otirā i Mahimaru, he kāinga kei te taha pāwhakarua o Kaitaia.

I raro i ngā manaakitanga a ngā kaumātua me ngā hapori o Muriwhenua, ka hangaia e Peter-Lucas te rautaki reo Māori mā Te Hiku Media me te aro nui ki te whakarauora i te reo o ngā haukāinga o Te Hiku o Te Ika. Mai i te tau 2011 ka mahi ngātahi a Peter-Lucas me ngā kaumātua ki te ārahi i Te Hiku Media ki te rekoata, ki te manaaki me te whakakao i ngā kōrero  mātauranga o nehe a Te Hiku o Te Ika, otirā me te whakarite whare kōrero ā tihi kia āhei atu ētahi ki ēnei kōrero.

He mema o mua a Peter-Lucas no Toi Aotearoa, ā, he kaiwhakarite kaupapa Tiriti anō hoki mō Te Aupōuri. Ko ētahi o āna mahi he mahi mā Te Taura Whiri i Te Reo Māori, ā, ko ia te Hēkeretari o te Poari Matua o Te Kōhanga Reo ā Motu. I tēnei wā tonu ko ia tētahi o ngā mema o Te Whakaruruhau o Ngā Reo Irirangi Māori o Aotearoa tae noa ki āna mahi i runga o ngā komiti maha ā iwi, ā hapori anō hoki.

He maha ngā paraihe pāpāho kua whakawhiwhia ki a Peter-Lucas me Te Hiku Media i te pō Whakawhiwhi Taonga a Ngā Irirangi Māori o te Motu otirā he maha ōna whēako mō te whakahaere me te waihanga pourewa pāpāho ā tihi mō te whakatipu me te whakawhiti i te reo Māori i te kāinga.